Im Weargliachat von Michel Buck

1	„Wôlli, Buaba, uß de Ziacha,
2	Jucket keack in d Hosa nei’,
3	Wôlli, ouf, ma’ gôht ge liacha!
4	Want er denn di Letschti sei’?
5	Z Ôbed ka’ ma’ wieder gruaba,
6	Jetza flink an d Arbet nous!“
7	Sait der Vater, und dia Buaba
8	Hupfet uß de Pfulba rous,
9	Beatet gschwind da Morgaseaga,
10	Langet d Löffel uß der Lad,
11	Thant a Pfanna Muas ousfeaga:
12	„Vaterle, mer kommet grad!“
13	D Magd staußt d Läda nous an d Reiber,
14	Fürbt dernô noh d Stuba gar,
15	D Muater gôht mit diesi Weiber
16	Schau’ ins Wearg, denn d Zeit ischt rar.
17	Jede liacht en Jau’ fürani,
18	Will da gräuschta Baussa hau’,
19	Und die dicki wia die rahni
20	Want it foul dahinta stauh’.
21	S wead derweil so umma Neune,
22	D Jeassazoina bringt der Bua,
23	D Krousa mit der Mill, koi’ kleine,
24	Mit em weißa’n Uebertua.
25	Und dia Liacher lieget, hocket
26	Uff da Boda, wias en gfällt,
27	Und in d Schüssel weads jetz brocket,
28	Bis as d Löffel oufreacht stellt.
29	Nais und Nysi jeasset zaischta,
30	Und se trialet schiar in d Wett;
31	Freili haunt se au am meischta,
32	Schiar füar fainfe, Hunger ghett.
33	Kriaget doch dia arme Tropfa
34	Nia koi’ Mill im Hiatahous,
35	Müasset d Bäu mit Braut verstopfa
36	Und mit Wasser schwenka’n ous.
37	Aber was ischt dött im Au’ser?
38	Ischt as it der Brenntawei’?
39	Jô, a Guttra wia a Gau’ser!
40	S Bescht kommt gmoingle hintadrei’.
41	Was doch so a Budel machet,
42	Wenn sen rum im Roiha launt!
43	Wia dia Liacher Scholla lachet
44	Und a Gschroi und Lusi haunt!
45	„Jetz isch Höri,“ sait der Vater,
46	Schuibt dia Guttra wieder ei’,
47	„S wead a’fanga z lout des Gschnatter,
48	Und mei’ Wearg muaß glocha sei’!“
49	Wia se jetz fürani schreitet,
50	Wia se liachet noh so ring!
51	Aih ma’ d Weiberschröcki läutet,
52	Stôht nu’ noh a Fiderling.
53	D Weiber schlupfet jetz in d Juppa,
54	Gauhnt in Fleacka gschwind voara’,
55	Denn se müaßet richta d Suppa,
56	Daß ma’ z Zwölfe jeassa ka’.
57	D Tisch sind gricht und d Stüahl und d Schranna,
58	Jetz nu’ rei’ zum Gabelgfeacht!
59	S stauhnt zwua graußi Nudlapfanna
60	Siedig uff de Pfannakneacht.
61	S Weißbier in der Körbikrousa
62	Druckt bereits da Simbsa ra,
63	Thuat as au it feindle sousa,
64	Schwemmts doch Schmotz und Nudla na.
65	D Liacher thant in d Stuaba treata,
66	D Weiber wischt und d Manna hott,
67	Fanget a’ gem Jeassa beata.
68	Und se hudlet – s ischt a Spott.
69	Und se sitzet glei in Roiha,
70	Wias der Vater gornat hôt,
71	Und se thant si so vermoia,
72	Daß ma’ nix maih überlôht.
73	Zaischta kommt a Küachlasuppa,
74	Aber s ma’ se koiner dünn,
75	S schwimmet Brocka rum wia d Gruppa
76	In der graußa Schüssel dinn.
77	Nôcha kommet gschupfti Nudla,
78	Krout und Streichat sind derbei -
79	„Hebet Sorg und thant it hudla,
80	D Küachla kommet au gauh glei!“
81	D Krousa gôht jetz rum im Roiha
82	Und ma’ feucht dia Nudla’ ei’.
83	Denn ma’ müaßts suscht mit der Hoia
84	In dia Mäga stampfa nei’.
85	Endli kommt der öbrischt Sprissel
86	Von der Himmelsloiter au,
87	D Bäuri bringt a Küachlaschüssel
88	Aellbereits a’n Ehla hauh.
89	Dutzad Händ dia sieht ma’ greifa
90	Mitanand in Küachlabearg,
91	Koiner könnt ui jetz maih pfeifa,
92	Gälts en goldna Baussa Wearg.
93	Und s pureutig Schmalz lauft hanna,
94	Danna an de Mäuler na,
95	Jedes thuat uffs schmotzigscht spanna,
96	D Grait wia d Gull und d Alea.
97	Aber zletschta muaß ma’ houfa,
98	Endli ab die Küachla lau’,
99	Bärig ka’ ma’s maih verschnoufa
100	Und der Vater beatet schau’.
101	Und der Vater, suscht fürani,
102	Macht as desmôl küzer a,
103	S gfällt em it des lahm Sagani:
104	„Gaunt jetz nu’ in Tenna na!“
105	Bärig gsait, so hairet älli,
106	Machets Kreuz und dousset futt,
107	Stealzanazi mit em Gälli,
108	D Wuzamei mitsannt der Schlutt.
109	Haunt im Tenna au’verdrossa,
110	Wias des Gschäft von seall so geit,
111	Stiefel, Toffla, Schuah und Bossa
112	Zaischta ällz uff d Seita keit,
113	Bôarfuß nôch in d Schalta gstaußa
114	Zwears dur d Schuir da Riffelbom,
115	Denn bei so vel Dutzet Baussa
116	Broucht ma schau’ a mächtigs Trum.
117	Sind dernô an d Riffla gstanda
118	Uff da Tenna feucht und häl,
119	D Manna hanna, d Weiber danna,
120	Paar und Paar an jedem Strähl.
121	Bolla fallet ganze Häufa
122	Mit de dürre Blättla na.
123	D Riffler thant jetz singa, pfeifa,
124	Au anand uff d Bückel schla
125	Mit de schweri Bollasanga,
126	Freili gschieht es nu’ im Gspaß,
127	Aber s wead derbei ma’ manga
128	Denischt doch a'n Aeugle naß.
129	Nysi woißt so alti Schnôka,
130	Zennat wia’n a bißger Goul
131	Und verzuiht druff zum a Hôka
132	Wieder glei s Hanswuschtelmoul.
133	D Buaba, d Mädla, d Weiber lachat,
134	S ischt a reachti Kugelfuahr,
135	S gôht, wenn Alti Possa machet,
136	Bei de Jungi über d Schnuar.
137	Wäger, dô ischt au so ganga,
138	Haunt anand bereits verküßt.
139	„Halt, i will ui s Weatter sanga!“
140	Sait der Vater, „hau’s it gwüßt,
141	Daß er so vol Bosget steackat.
142	Seahnt er dô da Hagaschwanz?
143	Schla gauh’ glei äll ôdragfleackat,
144	Laß koi’ Nôht am Kittel ganz.
145	Launt dia Theama, sag i, schaffet,
146	Fallet d Läus von ui aweag;
147	Wenn er nu’ uff d Narra gaffet,
148	Gôht dui Arbet it vom Fleack.
149	Und iahr alti Esel, hairet,
150	S Schaffa stünd ui besser a’,
151	Wenn er dô, statt daß er stairet,
152	Hofreacht müechtet au da’ Ma’.
153	Singa, Johla, Gspäß in Aihra!
154	Was oin in der Orning deucht,
155	Ma’ i seall beim Schaffa haira,
156	Denn as macht oim d Arbet leicht.
157	Aber d Juged so verfüahra,
158	Schla mi s Bläßle, gôht it a’.
159	Siehni nomôl karassiara,
160	Schlani äll in Tenna na’.“ –
161	Saits und luagat fuirig ummi,
162	Aber s muckt se koiner maih,
163	It der Veri, it der Dommi,
164	It der Veit und Batlamai,
165	Gschweigis d Grait und d Nais und d Zilla,
166	D Zofei, d Mei und d Ulia’,
167	O dia sind so mäuslestilla,
168	Daß ma’ Leinset säa’ ka’.
169	Und der Vater wôrflat d Bolla
170	Hintre gegam Deichselloch,
171	D Buaba müasset Fuater holla,
172	Und so bschluißt ma’ d Liacharwoch.

Details zum Gedicht „Im Weargliachat“

Gedicht-Analyse

Bei dem vorliegenden Text handelt es sich um das Gedicht „Im Weargliachat“ des Autors Michel Buck. Im Jahr 1832 wurde Buck in Ertingen, Oberamt Riedlingen geboren. Das Gedicht ist im Jahr 1888 entstanden. Der Erscheinungsort ist Stuttgart. Eine Zuordnung des Gedichtes zu den Epochen Realismus oder Naturalismus kann auf Grund der Entstehungszeit des Gedichtes bzw. der Lebensdaten des Autors vorgenommen werden. Die Zuordnung der Epochen ist ausschließlich auf zeitlicher Basis geschehen. Bitte überprüfe unbedingt die Richtigkeit der Angaben bei Verwendung. Das 977 Wörter umfassende Gedicht besteht aus 172 Versen mit insgesamt 43 Strophen. Weitere bekannte Gedichte des Autors Michel Buck sind „Am Kinderbrunna“, „Am sechsta Meza anna 83ge“ und „An der Gmoi’dszuga“. Zum Autor des Gedichtes „Im Weargliachat“ liegen auf unserem Portal abi-pur.de weitere 55 Gedichte vor.

Weitere Gedichte des Autors Michel Buck (Infos zum Autor)

• A Gschichtle vom guata Philipp Neri
• A Trom
• Am Bächle
• Am Kinderbrunna
• Am sechsta Meza anna 83ge
• An der Gmoi’dszuga
• Auf den Tod meines lieben Söhnleins Hermann
• Auf den Tod meines lieben siebenjährigen Töchterchens Hilda Antonia
• Auf die Beerdigung meines Schwähers
• D Blockstrecker

Zum Autor Michel Buck sind auf abi-pur.de 55 Dokumente veröffentlicht. Alle Gedichte finden sich auf der Übersichtsseite des Autors.