Die Wiese von Johann Peter Hebel

1	Wo der Dengle-Geist in mitternächtige Stunde
2	Uffeme silberne Gschirr si goldeni Sägese denglet,
3	(Todtnau’s Chnabe wüsse’s wohl) am waldige Feldberg,
4	Wo mit liebligem Gsicht us tief verborgene Chlüfte
5	d’Wiese luegt, und check go Todtnau aben ins Thal springt,
6	schwebt mi muntere Blick, und schwebe mini Gidanke.
7	Feldbergs liebligi Tochter, o Wiese, bis mer Gottwilche!
8	Los, i will di iez mit mine Liederen ehre,
9	und mit Gsang bigleiten uf dine freudige Wege!
10	Im verschwiegene Schoos der Felse heimli gibohre,
11	an de Wulke gsäugt, mit Duft und himmlischem Rege,
12	schlofsch e Bütscheli-Chind in di’m verborgene Stübli
13	heimli, wohlverwahrt. No nie hen menschligi Auge
14	güggele dörfen und seh, wie schön mi Meiddeli do lit
15	im christalene G’halt und in der silberne Wagle,
16	und ’s het no kei menschlich Ohr si Othmen erlustert,
17	oder si Stimmli ghört, si heimli Lächlen und Briegge.
18	Numme stilli Geister, si göhn uf verborgene Pfade
19	us und i, si ziehn di uf, und lehre di laufe,
20	gen der e freudige Sinn, und zeige der nützligi Sache,
21	und ’s isch au kei Wort verlohre, was sie der sage.
22	Denn so bald de chaschst uf eigene Füeßlene furtcho,
23	Schliefsch mit stillem Tritt us di’m christalene Stübli
24	barfis usen, und luegsch mit stillem Lächlen an Himmel.
25	O, wie bisch so nett, wie hesch so heiteri Aeugli!
26	Gell, do ussen ischs hübsch, und gell, so hesch ders nit vorgstellt?
27	Hörsch, wie’s Läubli ruuscht, und hörsch, wie d’Vögeli pfife?
28	Io, de seisch: „I hörs, doch gangi witers und blib nit.
29	„Freudig isch mi Weg, und alliwil schöner, wi witer!“
30	Nei so lueg me doch, wie cha mi Meiddeli springe!
31	„Chunnsch mi über,“ seits und lacht, „und witt mi, se hol mi!“
32	All’wil en andere Weg, und alliwil anderi Sprüngli!
33	Fall mer nit sel Reinli ab! – Do hemmers, i sags io, –
34	hani’s denn nit gseit? Doch gauckelet’s witers und witers,
35	groblet uf alle Vieren, und stellt si wieder uf d’Beinli,
36	schlieft in d’Hürst, – iez such mers eis! – dört güggelets use.
37	Wart, i chumm! Druf rüefts mer wieder hinter de Bäume:
38	„Roth, wo bin i iez!“ – und het sie urige Phatest.
39	Aber wie de gohsch, wirsch sichtli größer und schöner.
40	Wo di liebligen Othem weiht, se färbt si der Rase
41	grüner rechts und links, es stöhn in saftige Triebe
42	Gras und Chrüter uf, es stöhn in frischere Gstalte
43	farbige Blüemli do, und d’Immli chömmen und suge.
44	’s Wasserstelzli chunnt, und lueg doch, ’s Wuli vo Todtnau!
45	Alles will di bschauen, und Alles will di bigrüße,
46	und die fründlig Herz git alle fründligi Rede:
47	„Chömmet ihr ordlige Thierli, do hender, esset und trinket!
48	Witers goht mi Weg, Gsegott, ihr ordlige Thierli!“
49	Rothet iez, ihr Lüt, wo üser Töchterli hi goht!
50	Hender gmeint an Tanz, und zue de lustige Buebe?
51	z’Uzefeld verbei gohts mit biwegliche Schritte
52	zue de schöne Buechen, und hört e heiligi Meß a.
53	Guet erzogen ischs, und anderst cha me nit sage.
54	No der heilige Meß se seits: „Iez willi mi schicke,
55	aß i witers chumm.“ – Iez simmer scho vornen an Schönau,
56	iez am Chastel verbei, und alliwil witers und witers
57	zwische Berge und Berge im chüele duftige Schatte,
58	und an mengem Chrütz verbei, an menger Kapelle.
59	Aber wie de gohsch, würsch alliwil größer und schöner.
60	Wo di liebligen Othem weiht, wie färbt si der Rase
61	grüener rechts und links, wie stöhn in chräftige Triebe
62	neui Chrüter do, wie schießen in prächtige G’stalte
63	Bluemen an Bluemen uf, und geli saftigi Wide!
64	Vo di’m Othem gwürzt, stöhn rothi Erdberi-Chöpfli
65	Millione do, und warten am schattige Thalweg.
66	Vo di’m Othem g’nährt, stigt rechts an sunnige Halde
67	goldene Lewat uf in Feldere Riemen an Rieme.
68	Vo di’m Othem g’chüelt, singt hinter de Hürste verborge
69	freudig der Hirte-Bueb, und d’ Holz-Ax tönet im Buechwald.
70	’s Mambecher Hätteli chunnt, und wulligi Häli vo Zell her.
71	Alles lebt und webt, und tönt in freudige Wiise;
72	Alles grüent und blüeiht in tusigfältige Farbe;
73	Alles isch im Staat, und will mi Meiddeli grüße.
74	Doch de bisch ke Meiddeli meh, iez sag i der Meidli.
75	Aber an der Bruckwoog, nit wit vom steinene Chrützli,
76	chresme d’Büebli vo Zell hoch an de felsige Halde,
77	suechen Engelsüeß, und luegen aben und stune.
78	„Toneli, seit der Sepli, was het echt d’ Wiesen im Chöpfli?
79	Lueg doch, wie sie stoht, und wie sie nieder an d’ Stroß sitzt
80	mit vertieftem Blick, und wie sie wieder in d’ Höchi
81	schießt, und in d’ Matte lauft, und mittere selber im Champf isch!“
82	Feldbergs Tochter, los, de g’falsch mer numme no halber!
83	’s goht mer, wie dem Sepli. Was hesch für Iesten im Chöpfli?
84	Fehlt der näumis, se schwetz, und hättsch gern näumis, se sag mer’s!
85	Aber wer nüt seit, bisch du! Mit schwankige Schritte
86	Laufsch mer d’Matten ab in dine tiefe Gidanke
87	furt ins Wiesethal, furt gegenem Husemer Bergwerch,
88	und schangschiersch der Glauben und wirsch e luthrische Chetzer!
89	Hani’s denn nit gseit, und hani mers echter nit vorgstellt?
90	Aber jez isch so, was hilft jez balgen und schmähle!
91	Aendere chani’s nit, se willi der lieber gar helfe;
92	öbbe bringsch mer doch no Freud und heiteri Stunde!
93	Halt mer e wenig still, i will di jez lutherisch chleide;
94	s’ schickt si nümme barfis z’laufe, wemme so groß isch.
95	Do sin wißi Bauwele-Strümpf mit chünstlige Zwickle,
96	(leg sie a, wenn d’ chasch!) und Schueh und silberni Rinkli;
97	do ne grüene Rock! vom breit verbendlete Liibli
98	fallt bis zu de Chnödlenen abe Fältli an Fältli.
99	Sitzt er recht? Thue d’Häftli i! und nimm do das Brusttuech,
100	sammet und roseroth. Jez flichtider chünstligi Zupfe
101	us de schöne, sufer g’strehlte, flächsene Hoore.
102	Obe vom wiißen Aecken und biegsem in d’Zupfe verschlunge,
103	fallt mit beiden Ende ne schwarze sidene Bendel
104	bis zum tiefe Rock-Saum abe. – G’fallt der die Chappe,
105	wasserblaue Damast und gstickt mit goldene Blueme?
106	Zieh der Bendel a, wo in de Ricklene durgoht,
107	unter de Zupfe dure, du Dotsch, und über den Ohre
108	fürsi mittem Letsch, und abe gegenem Gsicht zue!
109	Jez e side Fürtuech her, und endli der Hauptstaat,
110	zwenzig Ehle lang und breit e Mailänder Halstuech!
111	Wie ne luftig Gwülch am Morgehimmel im Früehlig
112	’schwebts der uf der Brust, stigt mittem Othem, und senkt si,
113	wahlet der über d’Achsle, und fallt in prächtige Zipfle
114	übere Rucken abe, sie ruusche, wenn de’n im Wind gohsch!
115	Het me’s lang, se loßt me’s henke, hör i mi Lebtig.
116	D’Ermel, denk wol, henksch an Arm, wils’ Wetter so schön isch,
117	aß me’s Hemd au sieht, und dini gattigen Aermli,
118	und der Schie-Huet nimmsch in d’ Hand am sidene Bendel;
119	d’Sunne git eim wärmer, und schint eim besser in d’Auge,
120	wer en in de Hände trait, und ’s stoht der au hübscher!
121	Iez wärsch usstaffiert, as wenn de hofertig stoh wottsch,
122	und de g’fallsch mer selber wieder, chani der sage.
123	Wienes sie iez freut, und wie’s in zimpfere Schritte
124	tänzelet, und meint, es seig d’Frau Vögtene selber,
125	wie ’s si Chöpfli hebt, und jeden Augeblick z’ruck schielt,
126	öb me’s echt au bschaut, und öb men em ordeli noluegt!
127	Io, de bisch io hübsch, und io du Närrli, mer luege,
128	Du Marggröver-Meidli, mit diner goldige Chappe),
129	mit de lange Zupfen und mit der längere Hoorschnuer,
130	mittem vierfach z’semmegsetzte flattrige Halstuech!
131	Aber rothet iez, wo ’s hofertig Jümpferli hi goht!
132	Denk wol uffe Platz, denk wohl zuer schattige Linde,
133	oder in d’Weserei, und zue de Husemer Chnabe?
134	Hender gmeint? io wol! Am Bergwerch visperlets abe,
135	lengt e wenig duren, und trüllt e wengeli d’Räder,
136	was der Blos-Balg schnufe mag, aß d’ Füürer nit usgöhn.
137	Aber ’s isch si Blibes nit. In d’ Husemer Matte
138	schießt’s, und über d’Legi ab mit große Schritte go Farnau,
139	laufsch mer nit, se gilts mer nit, dur ’s Schopfemer Chilspel.
140	Aber z’Gündehuse, wer stoht echt an der Stroße,
141	wartet, bis de chunnsch, und goht mit freudige Schritte
142	uf di dar, und git der d’ Hand, und fallt der an Buese?
143	Chennsch di Schwesterli nit? ’s chunnt hinte füre vo Wisleth.
144	Uf und nieder hets di Gang und dini Gebehrde.
145	Io de chennschs, worum denn nit? Mit freudigem Brusche
146	Nimmschs in d’Arm, und losch’s nit goh, gib achtig, verdrucks nit!
147	Iez gohts wieder witers, und alliwil aben und abe!
148	Siehsch dört vorne ’s Röttler Schloß – verfalleni Mure?
149	In vertäfelte Stube, mit goldene Liiste verbendlet,
150	hen sust Fürste gwohnt, und schöni fürstligi Fraue,
151	Heren und Here-Gsind, und d’Freud isch z’ Röttle deheim gsi.
152	Aber iez isch Alles still. Undenklichi Zite
153	brenne keini Liechter in sine verrißene Stube,
154	flackeret kei Füür uf siner versunkene Füürstet;
155	goht kei Chrueg in Cheller, kei Züber aben an Brunne.
156	Wildi Tube niste dört uf mosige Bäume.
157	Lueg, dört ehnen isch Mulberg, und do im Schatte verborge
158	’s Föhris Hüsli, und am Berg dört d’ Höllstemer Chilche.
159	Steine lömmer liegen, und fahre duren in d’Matte,
160	guete Weg isch au nit um, und weidli chasch laufe.
161	Wenn ’s nit nidsi gieng, i weiß nit, öbbi der nochäm.
162	Unter Steine chunnsch mit dine biwegliche Schritte
163	wieder über d’Stroß. Iez wandle mer füren ins Rebland
164	Neben Hauigen aben und neben an Hagen und Röttle.
165	Lueg mer e wenig ufe, wer stoht dört oben am Fenster
166	in si’m neue Chäppli, mit sine fründligen Auge?
167	Neig di fin, zeig wie, und sag: „Gott grüßich, Her Pfarer!“
168	Iez gohts Thuemrige zu, iez witer in d’Lörecher Matte.
169	Siehsch das ordelig Städtli mit sine Fenstern und Gieble,
170	und die Basler Here dört uf der staubige Stroße,
171	wie sie riten und fahren? Und siehsch dört ’s Stettener Wirths-Hus!
172	Worum wirsch so still und magsch nit dure go luege?
173	Gell, de siehsch sel heilig Chrütz vo witem und trausch nit,
174	möchtisch lieber z’ruck, as fürsi! Loß der nit gruse!
175	’s währt nit lang, se stöhn mehr frei uf schwitzrischem Bode.
176	Aber wie de gohsch vom Bergwerch abe go Schopfe,
177	bis an Stetten aben uf diner steinige Landstroß,
178	bald am linke Bord, bald wieder ehnen am rechte
179	zwischenem Faschinat, wirsch alliwil größer und schöner,
180	freudiger alliwil, und schaffig, was me cha sage.
181	Wo di lieblichen Othem weiht, wie färbt si der Rase
182	grüener rechts und links, wie stöhn mit chräftige Triebe
183	neui Chrüter uf, wie prangen in höhere Farbe
184	Bluemen ohni Zahl. De Summer-Vögle thuet d’Wahl weh.
185	Wechslet nit der Chlee mit goldene Chettene-Blueme,
186	Frauemänteli, Hasebrödli, würzige Chümmi,
187	Sunneblueme, Habermark und Dolden und Ruchgras?
188	Glitzeret nit der Thau uf alle Spitzen und Halme?
189	Wattet nit der Storch uf hohe Stelze derzwische?
190	Ziehn sie nit vo Berg zue Berg in lange Reviere
191	feisti Matte Stunde wiit und Tauen an Taue?
192	Und derzwische stöhn scharmanti Dörfer und Chilchthürn.
193	’s Brombecher Mummeli chunnt, es chömme Lörecher Rößli,
194	freße der us der Hand, und springen und tanze vor Freude,
195	und vo Baum zue Baum, vo Zell bis füre go Rieche
196	halte d’Vögeli Jude-Schuel, und orglen und pfife.
197	(D’Brombecher Linde lit, der Sturmwind het si ins Grab gleit.)
198	Aber rechts und links, wie schwanken an flachere Reine
199	Rocken und Weizehalm! Wie stöhn an sunnige Halde
200	Reben an Reben uf! Wie woget uf höchere Berge
201	rechts und links der Buechwald und dunkleri Eiche!
202	O ’s isch Alles so schön, und überal anderst und schöner!
203	Feldbergs Tochter, wo de bisch, isch Nahrig und Lebe!
204	Neben an der ufen und neben an der abe
205	gigs’t der Wage, d’Geisle chlöpft, und d’Sägese ruschet,
206	Und de grüeßisch alli Lüt, und schwetzisch mit alle.
207	Stoht e Mühli näumen, en Oehli oder e Ribi,
208	Drothzug oder Gerste-Stampfi, Sägen und Schmidte,
209	lengsch mit biegsemen Arme, mit glenkseme Fingere dure,
210	hilfsch de Müllere mahlen und hilfsch de Meidlene ribe,
211	spinnsch mer’s Husemer Ise, wie Hanf in gschmeidigi Fäde.
212	(Gell, jez schlacht di’s Gwisse wieder wegenem Bosge!)
213	Eicheni Plütschi versägsch, und wandlet’s Ise vom Füürherd
214	uffen Ambos, lüpfsch de Schmiede freudig der Hammer,
215	singsch derzue, und gersch kei Dank, „Gott Grüeßich, Gott bhüetich!“
216	Und isch näume ne Bleichi, se losch di das au nit verdrieße,
217	chuuchisch e bizzele duren, und hilfsch der Sunne no bleiche,
218	aß sie ferig wird, sie isch gar grüselig langsem!
219	Aber solli eis, o Wiese, sage, wie ’s ander,
220	nu se sey’s bikennt! De hesch au bsunderi Jeste,
221	’s chlage’s alle Lüt, und sage, es sey der nit z’traue,
222	und wie schön de seigsch, wie liebli dini Gibehrde,
223	stand der d’Bosget in den Auge, sage sie alli.
224	Eb men umluegt, chresmisch näumen über d’Faschine,
225	oder rupfsch sie us, und bahnsch der bsunderi Fueßweg,
226	bohlsch de Lüte Stei uf d’Matte, Jaspis und Feldspat.
227	Hen sie näume gmeiht, und hen sie gwarbet und g’schöchlet,
228	holsch’s und treischs de Nochbere duren Arfel um Arfel.
229	’s sagen au e Theil, de seigisch glückli im Finde
230	uf de Bänke, wo nit g’wüscht sin, aber i glaubs nit.
231	Mengmol haseliersch, und ’s muß der Alles us Weg goh;
232	öbbe rennsch e Hüsli nieder, wenns der im Weg stoht.
233	Wo de gohsch, und wo de stohsch, isch Balgen und Balge.
234	Feldbergs Tochter, los, de bisch an Tuged und Fehler
235	zitig, chunnts mer halber vor, zum Manne, wie wär’s echt?
236	Zeig, was machsch für Aeugli? Was zupfsch am sidene Bendel?
237	Stell di nit so närrsch, du Dingli! ’s meint no, me wüß nit,
238	aß es versprochen isch, und aß sie enander scho bstellt hen?
239	Meinsch, i chenn di Holderstock, di chräftige Burst nit?
240	Ueber hochi Felsen, und über Stuuden und Hecke
241	eis Gangs us de Schwitzerberge gumpet er z’Rhinek
242	aben in Bodesee, und schwimmt bis füre go Chostanz,
243	seit: „I mueß mi Meidli ha, do hilft nüt, und batt nüt!“
244	Aber oben an Stei, se stigt er in langseme Schritte
245	wieder usem See mit sufer gwäschene Füeße,
246	Tiesehofe gfallt em nit und ’s Chloster dernebe,
247	furt Schafhuse zu, furt an die zackige Felse.
248	An de Felse seit er: „Und ’s Meidli mueß mer werde!
249	„Lib und Lebe wogi dra, und Chretze und Brusttuech,“
250	Seits, und nimt e Sprung. Iez bruttlet er abe go Rhinau;
251	trümmlig ischs em worde, doch chunnt er witers und witers.
252	Eglisau und Chayserstuhl und Zurzi und Waldshut
253	het er scho im Aecke, vo Waldstadt lauft er zu Waldstadt,
254	iez an Chrenzech aben in schöne breite Reviere,
255	Basel zu. Dört wird der Hochzit-Zedel geschriebe.
256	Gell, i weiß es! Bisch im Stand und läugnisch, was wohr isch?
257	Hätti z’rothe gha, ’s wär z’Wil e schickliche Platz gsi;
258	’s het scho menge Briggem si gattig Brütli go Wil gführt,
259	usem Züri-Biet, vo Liestel aben und Basel,
260	und isch iez si Ma, und ’s chocht em d’Suppen und pflegt em
261	ohni Widerred vo mine gnädige Here.
262	Aber di Vertraue stoht zum Chlei-Hüninger Pfarrer.
263	Wie de meinsch, se göhn mer denn dur d’Riechemer Matte!
264	Lueg, isch sel nit d’Chlübi, und chunnt er nit ebe dört abe?
265	Io er ischs, er ischs, i hörs am freudige Brusche!
266	Io er ischs, er ischs mit sine blauen Auge,
267	mit de Schwitzer-Hosen und mit der sammete Chretze,
268	mit de christalene Chnöpfen am perlefarbige Brusttuch,
269	mit der breite Brust, und mit de chräftige Stotze,
270	’s Gotthards große Bueb, doch wie ne Roths-Her vo Basel,
271	stolz in sine Schritten und schön in sine Gibehrde.
272	O wie chlopft der di Herz, wie lüpft si di flatterig Halstuch,
273	und wie stigt der d’Röthi iez in die lieblige Backe,
274	wie am Himmel ’s Morgeroth am duftige Maitag!
275	Gell, de bischem hold, und gell, de hesch ders nit vorgstellt,
276	und ’s wird der wohr, was im verborgene Stübli
277	d’Geister gsunge hen, und an der silberne Wagle!
278	Halt di numme wohl! – I möcht der no allerlei sage,
279	aber ’s wird der windeweh! Di Kerli, di Kerli!
280	Förchsch, er lauf der furt, se gang! Mit Thränen im Aeugli
281	rüefts mer: „Bhüetdi Gott!“ und fallt em freudig an Buese.
282	Bhüetdi Gott der Her, und folgmer, was i der gseit ha!

Details zum Gedicht „Die Wiese“

Gedicht-Analyse

Das Gedicht „Die Wiese“ stammt aus der Feder des Autors bzw. Lyrikers Johann Peter Hebel. Hebel wurde im Jahr 1760 in Basel geboren. Die Entstehungszeit des Gedichtes liegt zwischen den Jahren 1776 und 1826. Karlsruhe ist der Erscheinungsort des Textes. Eine Zuordnung des Gedichtes zu den Epochen Aufklärung, Empfindsamkeit, Sturm & Drang, Klassik, Romantik, Biedermeier oder Junges Deutschland & Vormärz kann aufgrund der Entstehungszeit des Gedichtes bzw. der Lebensdaten des Autors vorgenommen werden. Prüfe bitte vor Verwendung die Angaben zur Epoche auf Richtigkeit. Die Zuordnung der Epochen ist auf zeitlicher Ebene geschehen. Da sich Literaturepochen zeitlich überschneiden, ist eine reine zeitliche Zuordnung häufig mit Fehlern behaftet. Das Gedicht besteht aus 282 Versen mit insgesamt 33 Strophen und umfasst dabei 2660 Worte. Der Dichter Johann Peter Hebel ist auch der Autor für Gedichte wie „Das Liedlein vom Kirschbaum“, „Der Bettler“ und „Der Karfunkel“. Auf abi-pur.de liegen zum Autor des Gedichtes „Die Wiese“ weitere 60 Gedichte vor.

Weitere Gedichte des Autors Johann Peter Hebel (Infos zum Autor)

• Agatha, an der Bahre des Pathen
• An Herrn Geheimerath v. Ittner
• Auf den Tod eines Zechers
• Auf einem Grabe
• Das Habermuß
• Das Hexlein
• Das Liedlein vom Kirschbaum
• Der Bettler
• Der Karfunkel
• Der Knabe im Erdbeerschlag

Zum Autor Johann Peter Hebel sind auf abi-pur.de 60 Dokumente veröffentlicht. Alle Gedichte finden sich auf der Übersichtsseite des Autors.